BAKI, 25 mart — Sputnik. Britaniya şahzadəsi Çarlzın koronavirus testi müsbət nəticə verib. Sputnik Azərbaycan "Sky News" telekanalına istinadən xəbər verir ki, bu barədə rəsmi məlumatı Britaniya kral ailəsinin "Klarens Haus" iqamətgahı yayıb.
Bu gün verilmiş bəyanatda 71 yaşlı şahzadənin koronavirusa yoluxduğu təsdiqlənib.
"Uels şahzadəsinin koronavirus testinin nəticəsi müsbət olub. Onda yüngül simptomlar müşahidə olunur, lakin buna baxmayaraq sağlamlıq vəziyyəti yaxşıdır və həmişəki kimi son bir neçə gün ərzində evdən işləyir", - bəyanatda deyilir.
Çarlzın virusa kimdən yolxuduğunu müəyyənləşdirmək mümkün olmayıb. Onun həyat yoldaşı Kamilla da müayinə olunub, lakin onda koronavirus aşkar edilməyib.
Çarlz və Kamilla dövlətin və həkimlərin məsləhətlərinə uyğun olaraq hazırda Şotlandiyadakı evlərindən bayıra çıxmırlar.