BAKI, 16 mart — Sputnik. Səudiyyə Ərəbistanından Livanın paytaxtı Beyruta uçan təyyarədə bir neçə sərnişinin asqırması onların döyülməsinə səbəb olub.
Sputnik Azərbaycan Rusiya mediasına istinadən xəbər verir ki, həkimlər asqıran sərnişinlərə qoruyucu maskalar təklif ediblər.
Lakin onlar maskaları geyinməkdən imtina edib və sonra qəsdən digər sərnişinlərin üzərinə asqırmağa başlayıblar. Yayılan kadrlarda bunun təyyarədə çaxnaşmaya səbəb olduğunu görmək olar.
Ümumdünya Səhiyyə Təşkilatı (ÜST) "COVID-19" virusunun yayılmasını pandemiya elan edib.
Son məlumatlara görə, bütün dünyada 157 min insan koronavirusa yoluxub. Yoluxma halları 143 ölkədə aşkar edilib, 6 mindən çox adam ölüb, 75 min xəstə sağalıb.
Avropada koronavirusun yayılması üzrə birinci yeri İtaliya tutub: orada 24 mindən çox yoluxmuş şəxs aşkarlanıb, 1809 nəfər dünyasını dəyişib.