BAKI, 9 fevral - Sputnik. Neftçala şəhərində 4 mərtəbəli yaşayış binasında baş vermiş yanğın söndürülüb.
Sputnik Azərbaycan bildirir ki, bu barədə Fövqəladə Hallar Nazirliyinin yaydığı məlumatda deyilir. Məlumata görə, Neftçala rayonu, Neftçala şəhəri, H.Əliyev prospekti 4 ünvanında dördmərtəbəli yaşayış binasının dam örtüyündə baş verən yanğın Dövlət Yanğından Mühafizə Xidmətinin yanğınsöndürmə qüvvələri tərəfindən saat 21:15 dəqiqədə söndürülüb.
Xatırladaq ki, H.Əliyev prospektində yerləşən 40 mənzilli binanın elektrik naqillərində baş verən qısaqapanma zamanı binanın dam örtü yanmağa başlayıb. Hava küləkli olduğundan yanğının söndürülməsinə əngəl olub. Hadisə zamanı xəsarət alan olmayıb. Təcili yardımın 4 briqadasının əməkdaşları hadisədə qorxu keçirən sakinlərə yerindəcə ambulator yardım göstəriblər.