BAKI, 4 fevral — Sputnik. Tanınmış jurnalist Cavanşir Cahangirov vəfat edib. Sputnik Azərbaycan xəbər verir ki, uzun müddət xəstəlikdən əziyyət çəkən jurnalist bu gün səhər saatlarında 1 saylı Şəhər Klinik Xəstəxanada vəfat edib.
Cavanşir Muradxan oğlu Cahangirov 30 oktyabrda 1955-ci ildə Bakıda anadan olub. 1962-1972-ci illərdə Bakıdakı 172 saylı orta məktəbdə təhsil alıb. 1982-ci ildə Bakı Dövlət Universitetinin jurnalistika fakültəsini bitirib. 1983-cü ildə Azərbaycan Dövlət Televiziya və Radio Verilişləri Komitəsində kiçik redaktor kimi fəaliyyətə başlayıb. 1986-1992-ci illərdə "Gənclik" redaksiyasında baş redaktor olub. 2009-cu ildən 2015-ci ilə kimi "Azərbaycan Televiziya və Radio Verilişləri" Qapalı Səhmdar Cəmiyyətinin sədr müavini vəzifəsində çalışıb.
Qeyd edək ki, mərhum jurnalist ömrünün son günlərinədək Azərbaycan Radiosunun proqram direktorunun müavini və Teleradio Akademiyasının müəllimi kimi çalışıb.