BAKI, 2 fevral — Sputnik. Rusiya Silahlı Qüvvələrinin Baş Qərargah rəisi, ordu generalı Valeri Gerasimov və NATO-nun Avropadakı Müttəfiq Qüvvələrinin Baş Komandanı, general Tod Uoltersin Bakıdakı görüşü, güman ki, fevralın 6-7-də keçiriləcək.
Sputnik Azərbaycan bildirir ki, bu barədə RİA Novosti-yə diplomatik mənbədən məlumat verilib.
"Gələn həftə, təxminən fevralın 6-7-də Rusiya Silahlı Qüvvələrinin Baş Qərargah rəisi, Müdafiə nazirinin birinci müavini, ordu generalı Valeri Gerasimovla NATO-nun Avropadakı Müttəfiq Qüvvələrinin Baş Komandanı, amerikalı general Tod Uoltersin danışıqlara başlayacaqları gözlənilir. Gündəlikdəki məsələlər barədə ancaq tərəflər məlumatlıdır. Bakı ənənəvi görüş yeridir", - mənbə agentliyə bildirib.
Rusiya-NATO formatındakı əvvəlki görüş 2019-cu il noyabrın 26-da Bakıda keçirilmişdi. RF Müdafiə Nazirliyinin məlumatına görə, V.Gerasimovla NATO Hərbi Komitəsinin başçısı, baş aviasiya marşalı Stüart Piç Rusiya-NATO təmas xəttində insidentlərin qarşısının alınması tədbirlərini və hərbi ekspertlərin dialoqunun bərpası perspektivlərini müzakirə etmişdilər.