Nigar İsgəndərova, Sputnik Azərbaycan
BAKI, 28 yanvar — Sputnik. Bu gün Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN) ötən ilin yekunlarına dair hesabatı təqdim olunub. Sputnik Azərbaycan-ın xəbərinə görə, bununla əlaqədar olaraq təşkil olunan mətbuat konfransında illik rəqəmlər açıqlanıb. ASAN-ın sədri Ülvi Mehdiyev 2019-cu ilin yekunları ilə bağlı keçirdiyi mətbuat konfransında il ərzində mərkəzlərə 9 milyondan çox müraciətin daxil olduğunu deyib: "Fəaliyyət göstərdiyi 7 il ərzində "ASAN xidmət"ə 6 734 892 vətəndaş tərəfindən 35 410 334 müraciət daxil olub. Bu isə hər vətəndaşın ən azı 5 dəfə "ASAN xidmət"ə müraciət etməsi deməkdir".
Sədrin sözlərinə görə, orta gündəlik müraciət sayı 30 871-dir. Gün ərzində 2390 nəfər "ASAN xidmət"ə ilk dəfə müraciət edir. Ü.Mehdiyevin sözlərinə görə, müraciətlərin əksəriyyəti şəxsiyyət vəsiqələrinin verilməsinə görədir: "Gün ərzində "ASAN xidmət"də 3718 nəfərə şəxsiyyət vəsiqəsi verilir. Eyni zamanda bir gün ərzində "ASAN xidmət"də 408 nikah qeydə alınır".