BAKI, 13 dekabr — Sputnik. İnternet xəbər sayıtlarında və sosial şəbəkə hesablarında yük avtomobilini idarəedən əlil sürücünü Yol Patrul Xidməti əməkdaşlarının saxlamasını əks etdirən video görüntü paylaşılıb.
Daxili İşlər Nazirliyinin Baş Dövlət Yol Polisi İdarəsindən faktla bağlı Sputnik Azərbaycan-a verilən məlumatda bildirilir ki, noyabrın 11-də Bakı-Qazax avtomobil yolunda hərəkətdə olan 99-SH-688 dövlət qeydiyyat nişanlı yük avtomobilinin sürücüsü Seyidov Ramiz Bayram oğlu yol hərəkəti qaydalarını pozduğu üçün YPX əməkdaşları ona "saxla" işarəsi veriblər. Lakin R.Seyidov polisin qanuni göstərişinə tabe olmayıb və digər hərəkət iştirakçılarına ciddi təhlükə yaradan manevrlər etməklə hərəkətini davam etdirib. Qayda pozan sürücünün saxlanılması üçün qanuna müvafiq tədbirlər görülsə də, o, BDYPİ-nin digər stasionar postlarında da YPX əməkdaşlarının həyatı üçün təhlükə yaradaraq növbəti dəfə əmrə tabe olmayıb. Nəhayət, paytaxtın 20 Yanvar dairəsində idarə etdiyi yük avtomobilini saxlamağa məcbur olan R.Seyidov, burada YPX əməkdaşlarına qarşı aqressiv davranış nümayiş etdirib, hadisəni izləyən insanların həqiqətdən xəbərsiz olmasından istifadə edərək emosional çağırışlar edib və bununla da törətdiyi qanunazidd əməlləri pərdələməyə çalışıb. Digər hərəkət iştirakçılarının daha çox zərər çəkə biləcəyi ehtimalını nəzərə alaraq, zəruri tədbirlər görülüb və hazırda sözügedən faktla bağlı müvafiq araşdırma aparılır.