BAKI, 1 noyabr — Sputnik. Paytaxtın bir neçə küçəsində yolun hərəkət hissəsində aparılan təmir işləri müntəzəm marşrut xətt avtobuslarının hərəkətinə maneə yaradır.
"Yolun hərəkət hissəsində aparılan təmir-tikinti işlərinin vaxtında yekunlaşmaması, eyni zamanda təmir müddətində nəqliyyat vasitələrinin hərəkəti üçün uyğun şəraitin yaradılmaması sonda məhz bu cür çətinliklərə səbəb olur".
Sputnik Azərbaycan-ın məlumatına görə, bu barədə Bakı Nəqliyyat Agentliyinin mətbuat katibi Mais Ağayev məlumat verib. O bildirib ki, mövcud vəziyyətdən ən çox əziyyəti isə ictimai nəqliyyatdan istifadə edən sərnişinlər çəkirlər: "Bu cür problemlər eyni zamanda avtobusların istismar müddətinin azalmasına və amortizasiya xərclərinin artmasına gətirib çıxarır. Şəhər mərkəzindən "20-ci sahə" adlanan əraziyə gedən yolda olduğu kimi yolun hərəkət hissəsində aparılan işlərin yekunlaşmaması səbəbindən müntəzəm marşrut xətt avtobusları, xüsusən də "BakuBus" MMC-yə məxsus avtobusların hərəkəti çətinləşib. Təəssüf ki, analoji hallar bir çox küçələrdə var".