BAKI, 18 oktyabr — Sputnik. Bu ilin sonunadək Xəzərin Azərbaycan sektorunda dörd dənizaltı seysmoqraf qurulacaq. Bu barədə Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin (RSXM) baş direktoru Qurban Yetirmişli Sputnik Azərbaycan-a açıqlamasında deyib. O bildirib ki, seysmoqrafların qurulacağı yerlər artıq təsdiqlənib və bu işlər “Ümid”, “Bahar” və “Günəşli” yataqlarında aparılacaq.
Layihənin amerikalı ekspertlər tərəfindən icra olunduğunu deyən baş direktor bildirib ki, bunun üçün Azərbaycanın heç bir xərci çıxmayacaq.
Q.Yetirmişlinin sözlərinə görə, bu layihənin 2022-ci ildə hazırlanaraq təqdim olunması gözlənilir.
Qeyd edək ki, RSXM-in uzunmüddətli planlarına dənizdə seysmoloji tədqiqatlarının keyfiyyətinin artırılması daxildir. Hazırda Azərbaycanda istismarda olan seysmik stansiyaların sayı 35-dir. Həmin stansiyalar peyk sisteminə qoşulub. Ölkə ərazisinin seysmik aktiv nöqtələrində quraşdırılan vibrasiya sensorlarından məlumatlar peyk vasitəsilə real vaxt rejimində Bakıda yerləşən baş stansiyaya ötürülür. Məlumatlar emal edildikdən sonra, sistem zəlzələnin dəqiq yeri, vaxtı və gücü barədə məlumat verir.