BAKI, 26 sentyabr — Sputnik. Dünən "ADDIM" Gənclər Təşkilatının keçirdiyi gözəllik yarışı - "Miss&Mr National Azerbaijan"ın final gecəsi baş tutub.
Sputnik Azərbaycan xəbər verir ki, münsiflər heyətində ukraynalı buker Vitalina Rozbitskaya, Gürcüstanda "Maximum" model evinin sahibi İrina Çaxunaşvili, Moldovanın "Eurovision" təmsilçisi, Əməkdar artisti Olya Tira, türkiyəli kreativ direktor, stilist Erdi Şən, Əməkdar incəsənət xadimi Fəxriyyə Xələfova və millət vəkili Jalə Əliyeva yer alıblar.
Final gecəsində 10 qız, 10 oğlan olmaqla 20 iştirakçı yarışıb. Finalçılar modelyer Kübra Nuriyevanın "Etnike", türk dizayner Gülər Baysalın çimərlik geyimləri kolleksiyası və ukraynalı dizayner Katerina Lukaşukun məxsusi olaraq müsabiqə üçün hazırladığı kolleksiyaları təqdim ediblər.
Yarışın mükafat fondu 10 min AZN təşkil edib. Qaliblər Emil Həsənzadə və Nigar Qədirliyə ölkə xaricində xüsusi kristallar və svarovski daşları ilə hazırlanmış qiymətli taclar təqdim olunub.
Qeyd edək ki, digər nominasiyalarda qalib olan gənclərin beynəlxalq yarışlarda və beynəlxalq moda həftələrində iştirakını "ADDIM" Gənclər Təşkilatı öz üzərinə götürüb.
Gecədə moldovalı müğənni Olya Tira və müğənni Zamiq Hüseynov çıxış ediblər.
Onu da əlavə edək ki, layihəni fərqləndirən nüanslardan biri də odur ki, layihə çərçivəsində gənclərə xüsusi test çəkimləri, modellik sənəti üzrə beynəlxalq miqyaslı peşəkarlar tərəfindən təlimlər keçirilib. Gecənin aparıcıları İrəm Nəbiyeva və Fariz İlyasov olublar.