İstedad yarışması ən unikal və bacarıqlı fristayl, küçə və panna futbolçularını müəyyənləşdirmək üçün keçirilir. 12 ev sahibi ölkənin hər birindən iki qalib AVRO-2020 çərçivəsində matçlar və kubok turları zamanı, eləcə də fan zonalarda baş tutacaq müxtəlif tədbirlərdə iştirak etmək şansını qazanacaqlar.
Dünyaca məşhur fristayl futbolçular Liv Kuk və Tobias Beks yüzlərlə video müraciətin arasından hər şəhər üçün finalçıları seçiblər. Həlledici səsvermə azarkeşlər arasında keçiriləcək.
Səs verənlərin hamısı avtomatik olaraq uduşda iştirak edib müxtəlif prizlər – matç biletləri, avtoqraflı toplar və futbol köynəklərini udmaq şansı əldə edəcəklər.
“Tryukları turnirin keçiriləcəyi bütün şəhərlərdə izləmək olacaq. Hamını səsvermədə iştirak etməyə çağırıram. Fristayl da, futbolun özü kimi, bir çox cəhətdən özünüifadənin bir üsuludur. Bu gözəl video görüntüləri izləyən və onların arasında bəyəndiklərini seçən azarkeşlər özləri üçün bir çox yeni kəşflər edəcəklər”, - Kuk deyib.
Finalçılar müraciətlərinin taleyini öyrənmək üçün bir ay yarım gözləməli olacaqlar. Müsabiqə haqqında daha ətraflı məlumatı https://ru.uefa.com/uefaeuro-2020/your-move/ linki vasitəsilə əldə edə bilərsiniz. Bu link vasitəsilə həmçinin səs vermək olar.
Səsvermə 2019-cu il sentyabr 30-da Mərkəzi Avropa vaxtı ilə saat 14:00-da (Bakı vaxtı ilə saat 17:00-da) başa çatacaq.