BAKI, 28 avqust — Sputnik. Sentyabrın 1-3-də Rusiyanın Y.Vaxtanqov adına Moskva Dövlət Akademik Teatrı "Yevgeni Onegin" tamaşası ilə Bakıda çıxış edəcək.
Sputnik Azərbaycan xəbər verir ki, Azərbaycan Dövlət Akademik Musiqili Teatrında təqdim olunacaq səhnə əsərinin ideya, ədəbi kompozisiya və quruluşunun müəllifi Rimas Tuminas, səhnə quruluşçusu Adomas Yanovskis, musiqi müəllifi Fvustas Latenas, geyim rəssamı Mariya Danilova, xoreoqrafı Anjelika Xolina, musiqi rəhbəri Tatyana Ağayevadır.
Təxminən altmış nəfərlik aktyor heyətinin iştirak edəcəyi tamaşada əsas rollarda Sergey Makovetski, Lyudmila Maksakova, İrina Kupçenko, Aleksey Quskov, Viktor Dobronravov, Leonid Biçevin, Yevgeniya Kreqjde, Olqa Lerman və digər məşhur aktyorlar çıxış edəcəklər.
Qeyd edək ki, 3 saat 30 dəqiqə davam edən səhnə əsəri üç axşam ardıcıl nümayiş ediləcək. Teatrsevərlər 19:00-da başlayacaq tamaşaya biletləri teatrın kassasından və iticket.az saytından əldə edə bilərlər.