BAKI, 28 iyul — Sputnik. Monakonun kral ailəsində toydur.
Sputnik AzərbaycanDaily Mail-ə istinadən bildirir ki, Monako knyazı II Albertin bacısı oğlu və eyni zamanda Qreys Kellinin nəvəsi Lui Dükre sevib-seçdiyi Mari Şevalye ilə ailə qurub.
Sevgililər köhnə toy adətlərinə riayət etməyiblər. Ötən cümə günü, iyulun 26-da baş tutan nikahda Mari hər kəsin gözlədiyi kimi ağappaq gəlinlik deyil, fil dişi rəngində kombinezon geyinib. Bu geyimi onun üçün Rosa Clara moda evi hazırlayıb.
Lui ilə Marinin nikahını Monako meri Jorj Marsan kəsib. Bundan sonra qonaqları şahzadənin sarayındakı qeyri-rəsmi ziyafətə dəvət ediblər.
Sabahı gün isə bir zamanlar məşhur Hollivud gözəli Qreys Kelli ilə knyaz III Renyenin evləndiyi Monako kafedral kilsəsində dini nikah mərasimi baş tutub. Mari Şevalye bu dəfə əl işi olan krujeva və tikməli ağ gəlinlikdə kilsəyə gəlib. Onun bu paltarının hazırlanmasına Boisanger atelyesinin dərziləri 300 saat sərf ediblər.
Lui Dükre şahzadə Stefaniyanın böyük oğludur. Hazırda o, taxt-tacın varisliyi üçün 12-ci namizəd hesab edilir. Yeddi yaşınadək Monakoda qalan şahzadə anası ilə Fransaya köçüb, sonralar isə İsveçrədə yaşayıb. Fransanın prestijli SKEMA biznes məktəbini bitirib. Üç il əvvəl isə Şimali Karolina Universitetində "İdman menecmenti" ixtisası üzrə təhsilini davam etdirib.
Mari Şevalye ilə Lui universitetdə tanış olublar. İlk dəfə onlar ictimaiyyət arasında 2015-ci ildə görünüblər. Bu ilin fevralında Marinin vətəni Vyetnama romantik səyahətə gedəndə isə nişanlanıblar.