BAKI, 27 iyul — Sputnik. Ukrayna Prezidenti Vladimir Zelenskinin saytında Rusiya ilə hava əlaqəsinin bərpasını tələb edən petisiya yerləşdirilib.
Sputnik AzərbaycanRİA Novosti-yə istinadən xəbər verir ki, petisiya iyulun 25-də qeydə alınıb və artıq iyulun 27-ə 70-dən çox səs toplaya bilib.
"Hava əlaqəsinin ləğv edilməsi səbəbindən əsasən ailələri ilə görüşə bilməyən ukraynalılar əziyyət çəkirlər" – deyə petisiyanın yaradıcısı Viktoriya Temçenko deyib.
Ukrayna prezidentinin hava əlaqəsinə dair qərara yenidən baxması üçün petisiyanı üç ay ərzində 25 min insan dəstəkləməlidir.
2015-ci ilin oktyabrından etibarən Rusiya və Ukrayna arasında birbaşa hava əlaqəsi dayandırılıb. Bundan başqa, Ukrayna öz hava məkanının Rusiya aviaşirkətləri tərəfindən tranzit uçuşlar üçün istifadəsinə qadağa qoyub. Rəsmi Kiyev bu addımı Moskvanın "aqressiv hərəkət"lərinə cavab olaraq milli təhlükəsizliyini təmin etmək məqsədilə atdığını bildirib.
Apreldə Rusiyanın Federal Hava Nəqliyyat Agentliyi ("Rosaviasiya") Kiyevə müntəzəm və çarter reyslərini bərpa etmək təklifini verib. "Rosaviasiya" bunun sərnişinlərin maraqlarına cavab verdiyini bildirib.