BAKI, 23 iyul — Sputnik. Fars körfəzində tanker böhranının davam etdiyi bir vaxtda Tehran nüvə sazişinə hələ də üzv olan ölkələrlə təcili görüş keçirəcəyini bəyan edib.
Sputnik Azərbaycan "Agence France-Presse" agentliyinə istinadən xəbər verir ki, görüş iyulun 28-i baş tutacaq. Görüşün 2015-ci ildə imzalanmış nüvə sazişini qoruyub saxlamaq məqsədilə keçirildiyi bildirilir. Qeyd edək ki, Vaşinqtonun nüvə razılaşmasından çıxmasından sonra saziş qüvvəsini itirmək təhlükəsi ilə üz-üzə qalıb.
Məlumata görə, görüşün keçirilməsini sazişin avropalı üzvləri tələb ediblər. Onlar ABŞ-ın sazişdən çıxmasına cavab olaraq İranın razılaşma çərçivəsində nəzərdə tutulmuş öhdəliklərini azaltmasından sonra yaranmış "yeni vəziyyəti" müzakirə etmək istəyirlər.
"İyulun 28-i Vyanada Hərtərəfli Birgə Fəaliyyət Planının birgə komissiyasının növbədənkənar görüşünün keçirilməsi razılaşdırılıb", - İran Xarici İşlər Nazirliyi deyib.