Kamal Almuradlı, Sputnik Azərbaycan
BAKI, 1 iyul — Sputnik. Türkiyənin məşhur müğənnisi və aktyorları Bakıya gəliblər. Sputnik Azərbaycan xəbər verir ki, Murat Serezli, Taner Turan və klassik türk mahnılarının mahir ifaçısı Nebahat Nalan Höke Azərbaycan Akademik Musiqili Teatrda olublar. Səfər zamanı onları azərbaycanlı rejissor Kənan MM müşayiət edib.
Teatra gələn qonaqları qurumun direktor müavini Hüseyn Hüseynov qəbul edib. Səmimi və işgüzar şəraitdə keçən görüşdə iki qardaş ölkə arasındakı mədəni əlaqələrdən söhbət açılıb, bir sıra yaradıcı təkliflər səsləndirilib.
Türkiyəli sənətkarlar Akademik Musiqili Teatrın yaranma tarixi, inzibati binası, fəaliyyəti və mövcud vəziyyəti ilə yaxından tanış olublar.
Onlar həmçinin Teatrın səhnəsində gənc rejissor Elməddin Dadaşovun quruluşunda təqdim olunan "Buratino" (A.Rıbnikov, A.Tolstoy, tərc. N.Kazımov) tamaşasına da baxıblar. Səhnə əsərinin bu dəfəki nümayişinin xüsusi olaraq fiziki məhdudiyyətli uşaqlar üçün nəzərdə tutulduğu qonaqların diqqətinə çatdırılıb.
Tamaşanı izləyən və növbəti səfərlərində də mütləq Akademik Musiqili Teatra gəlmək niyyətlərinin olduğunu vurğulayan məşhurlar teatrın belə sosial layihələrdə iştirakını rəğbətlə qarşılayıblar.
Qeyd edək ki, Azərbaycanda Murat Sezerli "Savaşçı", "Seni seviyorum adamım", Taner Turan isə "Eşkıya dünyaya hükümdar olmaz", "Paramparça" serialları ilə tanınıb.