Rahim Zakiroğlu, Sputnik Azərbaycan
BAKI, 2 iyun – Sputnik. Ələt-Astara magistral yolunun Lənkəran rayonu Liman şəhəri ərazisindən keçən hissəsində ölümlə nəticələnən qəza baş verib.
Sputnik Azərbaycanın bölgə müxbirinin əldə etdiyi məlumata görə, Lənkəran rayonu Liman şəhər sakini, 1984-cü təvəllüdlü İxtiyar Şüşəxanov idarə etdiyi 99-BP-220 dövlət qeydiyyat nişanlı "Mercedes" markalı mikroavtobusla Cəlilabad rayon sakini İlkin Rzayevin idarə etdiyi 90-PN-921 dövlət qeydiyyat nişanlı "Renault" markalı minik avtomobili toqquşub. Toqquşmadan sonra mikroavtobus əvvəlcə yol kənarındakı beton səkiyə, sonra isə dəmir hasara çırpılıb.
Nəticədə mikroavtobusun sərnişini, 1983-cü il təvəllüdlü Liman şəhər sakini Vüqar Rzayev aldığı xəsarətlərdən hadisə yerində dünyasını dəyişib. "Mercedes" markalı mikroavtobusun sürücüsü İ. Şüşəxanov qapalı kəllə-beyin travması və sol diz sümüyünün açıq sınığı diaqnozu ilə Lənkəran Mərkəzi Rayon Xəstəxanasına çatdırılıb.
Faktla bağlı araşdırma davam etdirilir.