“Ölkəmizdə makroiqtisadi vəziyyət sabitdir. Mən qeyd etdim, inflyasiya aşağı səviyyədədir – 2 faizdən bir qədər çoxdur. Manatın məzənnəsi sabitdir. Belə olan halda, əlbəttə ki, süni qiymət artımına yol vermək qətiyyən olmaz”. Bu sözləri Prezident İlham Əliyev Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında söyləyib.
İqtisadçı-ekspert Fuad İbrahimov Sputnik Azərbaycan-a deyir ki, süni qiymət artımları monopolist qüvvələr tərəfindən həyata keçirilir:
“Bu da öz növbəsində arzuolunmaz mühitin yaranmasına səbəb olur. Süni qiymət artımları iqtisadi aktivliyə mane olur, makro-iqtisadi sabitliyin tarazlığına mənfi təsir göstərə bilir. Təəssüf olsun ki, bəzi işbazlar bazar iqtisadiyyatında bu yollardan istifadə edə bilirlər. Ölkə rəhbərliyi səviyyəsində buna müdaxilə olunsa, qısa zamanda qarşısının alınması mümkündür”.
Ekspertin geniş şərhinə audiofaylda qulaq asa bilərsiniz