BAKI, 2 may — Sputnik. Bakı 2019-cu ilin may bayramı günlərində turistlərin səyahəti üçün Müstəqil Dövlətlər Birliyinə üzv ölkələrin ən yaxşı şəhərləri reytinqinə düşüb. Sputnik Azərbaycan-ın məlumatına görə, reytinqi Rusiyanın TurStat Analitik Agentliyi müəyyənləşdirib.
TurStat-ın məlumatına görə, rusiyalı turistlərin may bayramında MDB ölkələrinə və yaxın xaricə turist səyahəti reytinqində Azərbaycan, Belarus və Qazaxıstan liderlik edir.
Cari ilin may ayında turistlərin səyahət etməyə üstünlük verdiyi MDB şəhərlərinin Top-10-luğu belədir: Bakı, Minsk, Nur-Sultan, Yerevan, Alma-Ata, Daşkənd, Bişkek, Kişinyov, Düşənbə və Aşqabad.
MDB şəhərlərinin reytinqi mayda turizm səfərləri üçün populyar olan yerlərin analizi nəticəsində tərtib edilib. Adətən turistlər mayda MDB şəhərlərinə 3-5 günlüyünə səyahət edirlər. Həmin müddətdə onlar bir günlük qidalanma və gecələmə üçün 60-120 dollar arası vəsait xərcləyirlər.
Turistlər şopinq və alış-veriş etmək üçün Bakıya üstünlük verirlər. Lakin MDB şəhərləri arasında turistlər üçün ən ucuz yer Moldovanın paytaxtı Kişinyov sayılır.