BAKI, 29 aprel — Sputnik. Avropa İttifaqının maliyyələşdirdiyi, BMT-nin İnkişaf Proqramının qismən maliyyələşdirdiyi və icra etdiyi "Genderə həssas Dayanıqlı İnkişaf Məqsədlərinin Həyata Keçirilməsində Vətəndaş Cəmiyyətinin Rolunun Araşdırılması" layihəsi çərçivəsində həyata keçirilən "Dayanıqlı İnkişaf Məqsədlərinin Tətbiqi Vasitəsilə Gender əsaslı Bələdiyyələrin Təşviqi" layihəsinin açılışı olub.
Sputnik Azərbaycan xəbər verir ki, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova bələdiyyələrdə qadınların 35 faiz təşkil etdiyini deyib: "Bu gün Azərbaycanda müxtəlif uğursuz ailələr var. Erkən nikaha daxil olan, qeyri-rəsmi münasibətlərdən doğulan azyaşlılar var. Onlar müxtəlif problemlərlə qarşılaşırlar. Bizim məqsədimiz bələdiyyələrdə qadınların işlə təmin olnması ilə yanaşı, onların aktivliyini də artırmaqdır".
Avropa İttifaqının Azərbaycan üzrə Nümayəndəliyinin Əməkdaşlıq Bölməsinin rəhbəri Simona Qatti isə qadınların ölkədəki, cəmiyyətdəki rolundan danışaraq layihə ilə bağı tövsiyələrini verib.
BMT-nin İnkişaf Proqramının Rezident Nümayəndəsinin səlahiyyətlərini icra edən Aleksandro Frakassetti isə qadınların milli inkişaf prosesinə təsirindən söz açıb. O, kənd qadını layihəsinə dəstəyin davam etdirilməsindən danışıb.
S.Qəhrəmanova təkrar qeyd edib ki, görülən bu tədbirlərin nəticəsində bu gün 105 qadın özünün kiçik biznesini qurub.