BAKI, 29 mart — Sputnik. Bakı şəhərinin Nizami rayonu ərazisində "Diqlas" ticarət mərkəzində baş vermiş yanğınla əlaqədar Komissiyanın yaradılması barədə qərar verilib. Sputnik Azərbaycan Nazirlər Kabinetinə (NK) istinadla xəbər verir ki, qərar baş nazir Novruz Məmmədov tərəfindən imzalanıb.
Bakı şəhərinin Nizami rayonu ərazisində "Diqlas" ticarət mərkəzində baş vermiş yanğınla əlaqədar aşağıdakı tərkibdə Komissiya yaradılsın:
Komissiyanın sədri
Yaqub Eyyubov – Azərbaycan Respublikası Baş nazirinin birinci müavini
Komissiyanın üzvləri
Kəmaləddin Heydərov – Azərbaycan Respublikasının fövqəladə hallar naziri
Samir Şərifov – Azərbaycan Respublikasının maliyyə naziri
Şahin Mustafayev – Azərbaycan Respublikasının iqtisadiyyat naziri
Mikayıl Cabbarov – Azərbaycan Respublikasının vergilər naziri
Ramil Usubov – Azərbaycan Respublikasının daxili işlər naziri
Pərviz Şahbazov – Azərbaycan Respublikasının energetika naziri
Zakir Qaralov – Azərbaycan Respublikasının Baş prokuroru
Səfər Mehdiyev – Azərbaycan Respublikası Dövlət Gömrük Komitəsinin sədri
Eldar Əzizov – Bakı Şəhər İcra Hakimiyyətinin başçısı
Arif Qasımov – Bakı şəhəri Nizami Rayon İcra Hakimiyyətinin başçısı
Komissiyaya hadisənin baş vermə səbəblərini və hadisə nəticəsində dəymiş maddi ziyanı tam araşdırıb yekun rəyi Azərbaycan Respublikasının Nazirlər Kabinetinə təqdim etmək tapşırılıb.
Sərəncam imzalandığı gündən qüvvəyə minir.
Qeyd edək ki, yanğın Nizami rayonunda yerləşən "8-ci km bazarı"nda, "Diqlas" ticarət mərkəzinin damında başlayıb. Hadisə yerinə Yanğından Mühafizə Xidmətinin əməkdaşları cəlb edilsə də, bina, tamamilə, yanaraq sırdan çıxıb. Hadisə zamanı 400 nəfərdən çox vətəndaşa zərər dəyib.