Müasir texnologiya nə qədər inkişaf etsə də və qadağan edilmiş yüklərin tapılması üçün nə qədər yeni texnologiya icad edilsə də, dövlət sərhədinin qorunması üçün Gömrük Xidmətində itlərə olan tələbat azalmır. Bu da başa düşüləndir – çünki ancaq itin burnu bir litr havada bir molekulu dəqiqliklə müəyyən edə bilər. Bundan əlavə, ancaq itlər minlərlə iyi ayırd edə və yadda saxlaya bilirlər.
Azərbaycan tranzit ölkə olduğundan, hər gün xəbərlərdə gömrükçülərin müxtəlif qaçaqmalın keçirilməsinin qarşısını almaları barədə məlumatı oxuyuruq. Çox zaman bu, gömrükçülərin quyruqlu köməkçiləri sayəsində baş tutur.
Gömrük Xidmətindəki Kineloji Mərkəz 2003-cü ildə yaradılıb. 3 hektar sahədə yerləşən bu mərkəz ən müasir şəkildə təchiz olunub. Volyerlərdə eyni zamanda 100-dən çox it saxlamaq mümkündür.
Hazırda mərkəzdə 60-dan çox it saxlanılır. Onların arasında alman və Belçika ovçarkaları, labradorlar, dobermanlar, senbernarlar və digər növlərdən olan itlər var. Mərkəz əməkdaşları nəinki onların təlimi ilə məşğuldurlar, həm də onların sayını artırmağa çalışırlar. Belə itlərin qiyməti kifayət qədər bahadır – Avropada onlara görə 10-15 min dollar təklif edirlər.