Təranə Xudabaxşiyeva, Sputnik Azərbaycan
BAKI, 25 yanvar — Sputnik. “Azərbaycanda qısa müddət ərzində 5 at eyni xəstəlikdən ölüb. Həkimlər isə atları müalicə edə bilmirlər”. Bu barədə Sputnik Azərbaycan-a Qarabağ atlarını yetişdirən Yaşar Quluzadə məlumat verib.
Onun sözlərinə görə, son bir ayda 5 at eyni xəstəlikdən ölüb: “Həkimlər iddia edir ki, Azərbaycandan keçən köçəri quşların nəcisləri dəyən otlardan yeyən atların halı qəfil pisləşir. Heç bir iynə və dərman kömək etmir. İstər cins atlar, istərsə də yorğa atlar bu xəstəlikdən məhv olur”.
“Həkimlər ilə söhbətim zamanı məlum oldu ki, bu virus quşlardan keçir və ona qarşı peyvənd var. Təəssüflər olsun ki, Azərbaycana gətirilmədiyindən atları başqa müalicə ilə xilas etmək mümkün olmur”, - deyə Yaşar Quluzadə əlavə edib.
O, digər at sahiblərinə də diqqətli olmağı məsləhət görüb: “Bu günlər at sahibləri diqqətli olmalıdırlar. Onlar atların qidasına fikir verməlidilər, quşların keçdiyi ərazilərdə atların otlamasına imkan verməməlidilər ki, bu cür xoşagəlməz hadisə ilə rastlaşmasınlar”.