BAKI, 13 dekabr — Sputnik. Baş nazir Novruz Məmmədov "Şimal-Cənub" Beynəlxalq Nəqliyyat Dəhlizinin Azərbaycan Respublikasının ərazisindən keçən hissəsində yeni yol oxu üzrə dəmir yolu xəttinin tikintisi altına düşən torpaqları dövlət ehtiyacları üçün alan orqanın müəyyən edilməsi barədə qərar verib.
Sputnik Azərbaycan Nazirlər Kabinetinə (NK) istinadla xəbər verir ki, qərara görə, "Şimal-Cənub" Beynəlxalq Nəqliyyat Dəhlizinin ölkə ərazisindən keçən 56 kilometrlik Qasımlı-Astara hissəsində yeni yol oxu üzrə dəmir yolu xəttinin tikintisi altına düşən torpaq sahələrini dövlət ehtiyacları üçün alan orqan "Azərbaycan Dəmir Yolları" QSC müəyyən edilib.
Qərarda qeyd edilir ki, "Azərbaycan Dəmir Yolları" QSC bu Qərarın 1-ci hissəsində göstərilən torpaq sahələrinin dövlət ehtiyacları üçün alınması ilə bağlı hazırlıq tədbirlərini "Torpaqların dövlət ehtiyacları üçün alınması haqqında" qanunun tələblərinə uyğun olaraq həyata keçirməli və bu barədə NK-ya təkliflər təqdim etməlidir.
Qərarın icrasına nəzarət Azərbaycan Respublikası NK Aparatının regionların inkişafı, kənd təsərrüfatı və ekologiya məsələləri şöbəsinə həvalə edilib.