BAKI, 3 dekabr — Sputnik. Suriya ordusu ölkənin cənubundakı Əs-Suveyda bölgəsində İraq və Şam İslam Dövləti (İŞİD) terror təşkilatının 270-dən çox terrorçusunu məhv edib. Sputnik Azərbaycan "RİA Novosti"-yə istinadən xəbər verir ki, bunu Rusiya Silahlı Qüvvələrinin Suriyada hərbi birləşmələrinin komandalığının rəhbəri Oleq Makareviç deyib.
O bildirib ki, terrorçuların məhv edilməsi üzrə əməliyyat çətin hava şəraitində həyata keçirilib. Belə ki, əməliyyatın keçirildiyi ərazidə iri kanyonlar və geniş mağaralar olub.
Makareviçin sözlərinə görə, əməliyyat həm də ona görə çətin olub ki, tank və ağır texnikanın bu ərazidə hərəkəti və manevr etmək qabiliyyəti məhdud olub. Terrorçuların isə xeyli sayda qumbaraatan, tank əleyhinə raket və 82 mm-lik minaatanları olub.
Əməliyyat nəticəsində hərbçilər xeyli sayda silah-sursat, həmçinin ABŞ istehsalı olan 12 ədəd idarə olunan tank əleyhinə "TOW" raketləri ələ keçiriblər.