Azərbaycanın məşhur modelləri və caz ifaçıları isti Kubadan olan qonaqlarla eyni səhnəni bölüşüblər.
Noyabrın soyuq havasına baxmayaraq, Heydər Əliyev Sarayındakı jAzzeri Bands konsertinə gələnləri əsl isti caz gecəsi qarşılayıb.
Konsert proqramını caz musiqisinin məşhur bilicisi və heyranı Rahib Azəri açıb. O, tamaşaçılara ənənəvi Bakı cazı barədə danışıb, "Bakport" klubunda keçirilən konsertləri xatırladıb və gələn musiqiçiləri təqdim edib.
Artıq 6-cı dəfə keçirilən jAzzeri Bands konsertində məşhur azərbaycanlı ifaçılar və gənc istedadlar çıxış edib. Onların arasında Əfqan Rəsul, Dihaj, Nərmin Məmmədli, Elina Maysuradze, Teymur Süleymanbəyli, Nərmin Kərimbəyova, Elvin Bəşirov və başqaları olub.
Gecənin əsas ulduzu isə Los Amigos qrupunda çıxış edən kubalı qonaq Yanssel Kastelon idi. Onun çıxışına ritmik Kuba cazının sədaları altında rəqs edən cütlük xüsusi rəng qatıb. Gecənin ən parlaq məqamı isə Yanssellə azərbaycanlı müğənni Samirə Rəcəblinin duet oxuması olub.