Eldar Tanrıverdiyev, Sputnik Azərbaycan
BAKI, 25 oktyabr — Sputnik. Azərbaycanın xarici işlər naziri Elmar Məmmədyarov Ermənistanın baş naziri vəzifəsini icra edən Nikol Paşinyanın Dağlıq Qarabağ münaqişəsinin nizamlanmasına dair sonuncu fikirlərinə münasibət bildirib.
Sputnik Azərbaycan xəbər verir ki, Məmmədyarov bu barədə Bakıda keçirilən VI Beynəlxalq Humanitar Forumu çərçivəsində jurnalistlərə açıqlma verib. Nazir belə bəyanatların Paşinyan tərəfindən ilk dəfə səsləndirilmədiyini qeyd edib
"Danışıqlar aparanda hazırlıq görülməlidir. Hansısa bəyanat veriləndə həmin şəxs nə dediyini düşünməlidir. Ortada sənədlər var, ATƏT-in Minsk Qrupunun mandatını oxumaq lazımdır. Burada açıq şəkildə yazılıb ki, münaqişədə tərəf Ermənistan və Azərbaycandır və danışıqlar da bu iki dövlət arasında aparılır" - deyə XİN başçısı vurğulayıb.
Qeyd edək ki, Nikol Paşinyan sözügedən bəyanatında Dağlıq Qarabağ separatçılarının danışıqlar masasında tərəf kimi qəbul edilməsi barədə qalmaqallı fikir səsləndirmişdi.