BAKI, 18 oktyabr — Sputnik. Krımın Kerç şəhərində kollecdə baş verən insident zamanı ölənlərin sayı 20-yə çatıb. Bu barədə Sputnik Azərbaycan Rusiya KİV-nə istinadən xəbər verir.
Faktı şəhər administrasiyası rəhbərinin müavini Dilavər Melqazıyev də təsdiqləyib. O, həmçinin əlavə edib ki, ağır vəziyyətdə olanlardan 8 nəfərinin şəxsiyyətini müəyyənləşdirmək mümkün olub.
Qeyd edək ki, ötən gün Krımın Kerç şəhərində Politexnik Kollecində əldəqayırma partlayıcı qurğu işə salınıb. Partlayış nəticəsində ölən və xəsarət alanların böyük əksəriyyəti yeniyetmələrdir.
Hücumu törətməkdə 18 yaşlı yerli sakin şübhəli bilinir. O, özünə qəsd edib. Krımda üç günlük matəm elan olub.