BAKI, 28 sentyabr — Sputnik. Merilin Monronun toy kabrioleti olan Ford Thunderbird satışa çıxarılıb. Sputnik Azərbaycanxarici mediaya istinadla xəbər verir ki, Monro bu kabrioletdə dramaturq Artur Millerlə təntənəli nikah mərasiminə yollanıb.
Sözügedən məşhur 1955-ci ildən 1962-yə qədər əfsanəvi Ford modelinə sahib idi. Öz zamanına görə bu avtomobil kifayət qədər güclü nəqliyyat vasitəsi sayılırdı. Beləliklə, modifikasiyasından asılı olaraq bu avtomobil 225 at gücünə malik olub və onun maksimal sürəti saatda 181 kilometr təşkil edib.
Sözügedən avtomobil mexaniki və avtomat sürət qutusuna malikdir.
Merilin Monronun toy maşını olan Ford Thunderbird 16-17 noyabr tarixlərində Los-Ancelesdə auksiona çıxarılacaq. Auksionun təşkilatçıları sözügedən avtomobilin satışından 300-500 min dollar əldə etməyi düşünür.