Eldar Tanrıverdiyev Sputnik Azərbaycan
BAKI, 13 sentyabr — Sputnik. “Rəcəb Tayyib Ərdoğanın Bakının işğaldan azad edilməsinin 100 illiyi münasibətilə keçiriləcək tədbirə qatılması təsadüfi deyil. Bununla dünyaya bir daha Türkiyə-Azərbaycan birliyini nümayiş etdiririk. Bu birlik sarsılmazdır”.
Sputnik Azərbaycan xəbər verir ki, bunu Baş nazirin müavini Əli Əhmədov "Birinci Dünya müharibəsi dövründə Osmanlı dövləti — Azərbaycan əlaqələri və Qafqaz İslam Ordusu" mövzusunda keçirilən beynəlxalq simpoziumda çıxışı zamanı bildirib.
Baş nazirin müavini, həmçinin əlavə edib ki, Azərbaycan və Türkiyə birliyini pozmaq istəyən qüvvələr var: "Onlar müxtəlif dövrlərdə də bu birliyi pozmağa çalışıb. Biz qürur hissi ilə deyə bilərik ki, heç vaxt bu birliyi pozmaq mümkün olmayıb və bu gün də mümkün deyil".
Əhmədov vurğulayıb ki, Türkiyə — Azərbaycan birliyi çox möhkəm təməllər üzərində qurulub: “Yaşadığımız bugünkü tarix bizi qürurlandıran, gələcəyə daha aydın baxmağa vadar edən, səsləyən tarixdir. Dünya çox mürəkkəb dövrünü yaşayır. Bu gün gələcəyin üzərinə çox ciddi şəkildə kölgə salan məqamlar var. Təbii ki, Azərbaycan və Türkiyə olaraq, biz bu təlatümlü anların gələcəkdə bizə nələr gətirəcəyini düşünmək üçün doğru yoldayıq”.
“Biz bu günlərdə daha çox bir-birimizin yanında olmalı, bir-birimizlə çiyin-çiyinə verməliyik" – Əli Əhmədov deyib.