BAKI, 23 avqust — Sputnik. Çinin ABŞ-a cavab həmləsi özünü çox gözlətmədi. Sputnik Azərbaycan Rusiya mətbuatına istinadla xəbər verir ki, Çin ABŞ-dan gətirilən məhsullara 25 faiz vergi tətbiq edib.
Bundan əvvəl ABŞ Çindən idxal olunan 16 milyard dollarlıq malların rüsumunu 25 faiz artırıb. Çin dərhal ABŞ-ın bu addıma qarşılıq verib. Belə ki, Çin tərəfi də Amerikadan idxal olunan 16 milyard dollarlıq malın rüsumunu 25 faiz artırır.
Daha əvvəl, ÇXR hökuməti ABŞ hərəkətlərinə cavab olaraq etirazını bildirmişdi. Çin rəsmiləri cavab tədbiri görmənin lazım olduğunu qeyd etmişdilər, rəsmi Pekin isə Birləşmiş Ştatların yeni idxal rüsumları ilə əlaqədar Ümumdünya Ticarət Təşkilatına etiraz etmişdi.
"Çin tərəfi bu addıma qarşı öz etirazını bildirir və atılan addımları cavabsız qoymayacaq" — deyə Çin Xalq Respublikasının Ticarət Nazirliyindən bildirilmişdi.