BAKI, 20 avqust — Sputnik. ABŞ prezidentinin milli təhlükəsizlik üzrə müşaviri Con Bolton Çin, İran və Şimali Koreyanın 2018-ci ildə keçiriləcək seçkilərə müdaxilə edəcəklərinə dair əllərində yetərli dəlillərin olduğunu deyib.
Sputnik Azərbaycan "Haber7"ə istinadla xəbər verir ki, Con Bolton əldə etdikləri sübutların narahatlıq doğurduğunu açıqlayıb.
O, 2016-cı ildə keçirilən seçkilərə Rusiyanın müdaxilə etdiyini iddia edib: "İki ildir ki, ABŞ-Rusiya münasibətləri gərgindir. Rusiya, noyabr ayında ABŞ-da keçiriləcək seçkilərə yenidən müdaxilə etməyə çalışa bilər. Buna digər 3 ölkə — Çin, İran və Şimali Koreya da qatıla bilər".
C. Bolton görülən tədbirlər və hazırlıqlar barədə məlumat verməyib, amma, kiber təhlükəsizliyin prioritet olduğunu dilə gətirib.
Qeyd edək ki, ABŞ prezidenti Donald Tramp da əvvəlki gün sosial media üzərindən etdiyi açıqlamada Çinin noyabr ayında keçiriləcək seçkilərə müdaxilə edə biləcəyi barədə xəbərdarlıq etmişdi.