BAKI, 20 iyul — Sputnik. Azərbaycan Respublikasının prezidenti İlham Əliyev Parisdə Fransanın SADE şirkətinin prezidenti Patrik Lölo ilə görüşüb. Sputnik Azərbaycan dövlət başçısının rəsmi saytına istinadən xəbər verir ki, görüşdə SADE şirkətinin Azərbaycanda "Ağıllı Şəhər" layihəsində və meliorasiya sahəsində fəaliyyətindən məmnunluq ifadə olunub.
Patrik Lölo bildirib ki, SADE Azərbaycanda fəaliyyətini bundan sonra da davam etdirmək niyyətindədir.
Prezident İlham Əliyev SADE şirkətinin Azərbaycanda fəaliyyətinin dəstəkləndiyini qeyd edib. Dövlətimizin başçısı vurğulayıb ki, meliorasiya sahəsi Azərbaycan üçün prioritet istiqamətlərdəndir.
Görüşdə əməkdaşlığın perspektivləri müzakirə olunub.
Bundan əlavə, Parisdə Azərbaycan Respublikasının Prezidenti İlham Əliyevin Fransa Milli Assambleyasının sədri Fransua de Rüji ilə də görüşü olub.