BAKI, 19 iyul — Sputnik. Dünən axşam saatlarında Sumqayıtda, dənizin "xalq çimərliyi" adlanan ərazisində 25 yaşlı Corat sakini batıb. Şahidlərin Sputnik Azərbaycan-a verdiyi məlumata görə, hadisə 18.00 radələrində baş verib.
"Feyruz ailədə 3 qardaşdan sonuncudur. Arıq, balacaboy oğlan idi. Dünən axşam dostları ilə istirahətə gəlib. Heç uzağa da getməyib. Elə dənizin içində 30 metrlikdə batıb, boğulub" — deyə hadisə şahidləri qeyd ediblər.
Batan şəxsin yaxınları, qohumları gecə saat 3-ə qədər dəniz kənarında olub, onu axtarıblar.
Fövqəladə Hallar Nazirliyinin məlumatına görə isə iyulun 18-də Sumqayıt şəhərində dənizdə batdığı ehtimal olunan, 1993-cü il təvəllüdlü Fərzəliyev Fehruz Bəylər oğlunun axtarışları başa çatıb.
F.Fərzəliyevin cəsədi Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu tərəfindən tapılaraq sudan çıxarılıb və aidiyyəti üzrə təhvil verilib.