İlham Mustafa, Sputnik Azərbaycan
BAKI, 15 iyul — Sputnik. Tovuz, Ağstafa və Qazax rayonlarına yağan güclü yağış kənd təsərrüfatına, əkin sahələrinə ciddi ziyan vurub.
Sputnik Azərbaycan-ın bölgə müxbiri xəbər verir ki, güclü yağış Tovuzun ucqar dağ kəndlərində, xüsusilə də Əsrik Cırdaxan, Bayramlı, Azaflı, Aşağı Quşçu kəndlərində dəmyə üsulu ilə əkilən sahələrdə kartof, pomidor, lobya, qarğıdalı, üzüm və s. tərəvəz məhsullarını kökündən yuyub. Yetişməkdə olan meyvələr də küləklə müşayiət olunan yağış nəticəsində yerlə yeksan olub. Ağaclar kökündən çıxıb. Güclü külək evlərin damını yararsız hala salıb. Əksər evləri su basıb.
Leysan xarakterli yağan yağışlardan sonra yaranan sel istirahət zonalarına gedən yollarda nəqliyyatın hərəkətində çətinlik yaradıb. Kəndlərdə elektrik enerjisinin təminatında uzunmüddətli fasilələr yaranıb. Rayon İcra Hakimiyyətinin nəzdində mövcud durumla əlaqədar fövqəladə komissiya yaradılıb. Əhaliyə dəyən maddi ziyan hesablanır.