İsti Bakı gecəsi, parlaq dekorasiyalar, çılğın tamaşaçılar və hit mahnılar. Azərbaycanlı pop-ulduz Damlanın Yaşıl teatrda baş tutan solo konserti məhz belə yadda qaldı.
Ötən gün Bakının yay konsert meydançasında daha çox Damla səhnə adı ilə tanınan populyar azərbaycanlı müğənni Məsumə Məmmədovanın konserti baş tutub.
Konsertin ilk dəqiqələrindən səhnəyə effektlə çıxan Damla tamaşaçıların diqqətini cəlb edə bildi. Müğənni konsertə xüsusilə hazırlanmışdı — möhtəşəm gümüşü libas və stilist Anar Ağakişiyev tərəfindən edilən makiyaj onu tamamilə dəyişmişdi.
"Xəncər" mahnısı ilə konsertə başlayan Damla həm öz, həm də digər müğənnilərin mahnılarını ifa etdi. Onun ifasında Aygün Kazımova, Xumar Qədimova və digər azərbaycanlı müğənnilərin mahnıları səsləndi.
Damla — Azərbaycanda ən məşhur toy ifaçılarından biridir. Müğənni ölkədən kənarda, xüsusilə də Rusiyada olduqca məşhurdur. Onu tez-tez bu ölkəyə mərasimlərdə iştirak etməyə dəvət edirlər.
Sputnik Azərbaycan Damlanın konsertinin informasiya tərəfdaşıdır.