Bakı metrosunun işləməməsi sərnişindaşıma sahəsində ciddi problemlərə səbəb olub. İyulun 4-ü səhər minlərlə insan işə çatmaq üçün böyük çətinliklərlə üzləşiblər.
Mingəçevirdəki Azərbaycan İES-dəki qəza səbəbilə Bakı metrosunun bağlanması paytaxt sakinləri üçün bir sıra problemlər yaradıb.
Bakının müxtəlif hissələrində vətəndaşlar böyük sərnişin kütləsinin öhdəsindən gələ bilməyən marşrut avtobuslarını saatlarla gözləməli olublar. Vəziyyəti yüngülləşdirmək üçün avtobus dayanacaqlarında yol polisinin müfəttişləri növbə çəkiblər.
Məlumat verildiyi kimi, bu gün Bakı Metropoliteni qatarların hərəkətini təmin etmək üçün elektrik enerjisinin verilişində dayanıqlıq olmadığından bir müddət test rejimində fəaliyyət göstərib.
Həmçinin qeyd edək ki, Bakı Metropoliteni test rejimində fəaliyyət göstərdiyindən 4 iyul 2018-ci il tarixində səhər saatlarından paytaxt ərazisindəki bütün müntəzəm marşrut xətləri xüsusi rejimdə fəaliyyətini davam etdirib və sərnişinlərin daşınması ödənişsiz həyata keçirilib.