İlham Mustafa, Sputnik Azərbaycan
BAKI, 30 iyun — Sputnik. Bu gün saat 18.15 radələrində Bakı-Qazax avtomobil yolunun Yevlax ərazisindən keçən hissəsində ağır yol qəzası baş verib.
Sputnik Azərbaycan-ın bölgə müxbirinin məlumatına görə, Şəmkirdən Bakı istiqamətində hərəkətdə olan "Mercedes Sprinter" mikroavtobusun HOWO markalı yük maşını ilə toqquşması nəticəsində biri uşaq olmaqla 3 nəfər həyatını itirib.
Qəza zamanı daha 7 nəfər ağır yaralanaraq Yevlax Şəhər Xəstəxanasına yerləşdirilib.
Şahidlərin bildirdiyinə görə, hadisə yük maşınının təkərinin partlayaraq idarəetmədən çıxaraq qarşı yol keçməsi nəticəsində baş verib.
Hazırda hadisə ilə əlaqədar araşdırma aparılır.