Bakı Ekspo Mərkəzində eyni zamanda iki sərgi — XVII Xəzər Beynəlxalq Nəqliyyat, Tranzit və Logistika sərgisi (TransCaspian/Translogistica 2018) və “Yol infrastrukturu və ictimai nəqliyyat” (Road & Traffic 2018) sərgisi keçirilib. Tədbirdə Azərbaycan, İran, Polşa, Belarus, Rusiya, Ukrayna, Türkiyə, ABŞ, Slovakiya və digər ölkələrdən olan şirkətlər iştirak ediblər.
Bu gün həm də XVII Xəzər Beynəlxalq Nəqliyyat, Tranzit və Logistika sərgisi çərçivəsində Azərbaycan Respublikası Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin (DANX) fəaliyyətinə dair "Avtomobil Nəqliyyatı- Yeni Yənzimləmə Konsepsiyası" mövzusunda konfrans keçirilib. Sputnik Azərbaycan xəbər verir ki, konfransda DANX-ın rəisi Həbib Həsənov xidmətin yeni fəaliyyət prinsiplərindən danışıb.
O, avtomobil nəqliyyatı sahəsi üzrə dövlət tənzimləməsi və nəzarət mexanizmlərinin beynəlxalq və qabaqcıl təcrübəyə uyğun olaraq təkmilləşdirilməsi məqsədilə bir sıra normativ hüquqi aktların layihələrinin hazırlanaraq aidiyyəti üzrə təqdim edildiyini bildirib.
H. Həsənov qeyd edib ki, sərnişin və yükdaşımalarında tətbiq olunan vergi mexanizminin təkmilləşməsi məqsədilə Vergilər Nazirliyi ilə məsləhətləşmələr aparılır: "Bu sahədə müasir informasiya kommunikasiya texnologiyalarından istifadə etməklə verginin tam həcmdə və vaxtında yığılmasının təmin olunması, vergidən yayınma hallarına qarşı nəzarətin gücləndirilməsi nəzərdə tutulur. Avtonəqliyyat vasitələri parkının yenilənməsi və növbəti 5 il ərzində nəqliyyatın orta istismar müddətinin təxminən 10 ilə qədər endirilməsi məqsədilə kompleks tədbirlər planı hazırlanır".
Konfransda bildirildi ki, beynəlxalq yükdaşımalarında iştirak edən yerli daşıyıcıların ölkəmizin geniş nəqliyyat logistika imkanlarından istifadəsi qənaətbəxş deyil. Yerli daşıyıcılar tərəfindən beynəlxalq daşımalarda təxminən 2000 avtonəqliyyat vasitəsi istismar olunur ki, bunun da yalnız 1239-u müasir tələblərə cavab verir.
Qeyd edək ki, Sputnik Azərbaycan hər iki sərginin informasiya tərəfdaşıdır.