Bakıda 7-ci mövsüm yüksək moda həftəsi olan "Azerbaijan Fashion Week" çərçivəsində keçirilən payız-qış kolleksiyasının nümayişi yekunlaşıb. Sputnik Azərbaycan xəbər verir ki, gecə ərzində Azərbaycan moda həftəsinin podiumunda əcnəbi və azərbaycanlı dizaynerlər öz işlərini nümayiş etdiriblər.
Gecənin hedlayneri təbii ki, öz geyim kolleksiyasını nümayiş etdirən fransalı dizayner Patrik Boffa idi. Həmişə olduğu kimi Patrikin hazırladığı geyimlər öz qüsursuz xətləri, yüngüllüyü və eleqantlığı ilə fərqlənir.
Gürcü dizayner Laşa Coxazde də gecənin qonağı idi. Laşanın adı moda trendlərini izləyən insanlara çoxdan məlumdur. Tbilisi həftəsinin rezidenti Bakıda mövsümün ən dəbli tendensiyalarını əks etdirən kolleksiya nümayiş etdirdi.
Azərbaycanlı dizayner Diana Əhədpurun nümayişini də vurğulamaq lazımdır. Təqdim olunan kolleksiya rənglərin yumşaqlığı və qadınlığı vurğulayan çoxsaylı detallarla fərqlənirdi
“Azerbaijan Fashion Week”-in sonuncu günündə, həmçinin Azərbaycan brendləri olan "Emilie Atelier", "Turkan Turkel", "Uventa", "Giedi"-nin kolleksiyaları da təqdim olunub.
Qeyd edək ki, “Azerbaijan Fashion Week” ildə iki dəfə keçirilir: may və noyabr aylarında. Onun əsasən məqsədi Azərbaycanda inkişaf edən moda sənayesinin populyarlaşdırılması və istedadlı dizaynerlərin öz işlərini nümayiş etdirmək üçün şərtlərin yaradılmasıdır.
Sputnik Azərbaycan "Azerbaijan Fashion Week"-in informasiya tərəfdaşıdır.