BAKI, 16 may — Sputnik. Mayın 10-da Zaqatala rayonunda Tala çayı daşıb, sel bir kəndi ağuşuna alıb. Sputnik Azərbaycan-ın bölgə müxbiri xəbər verir ki, sel suları Höytala və Üçüncütala kəndlərinin arasında olan Vöytala kəndini basıb və kəndin digər kəndlərlə əlaqəsi kəsilib.
Hazırda həmin kəndə gedən yollar bağlanıb. Sel zamanı Tala çayının bəndləri bir neçə yerdən qırıldığı üçün su axınının qarşısını almaq mümkün olmayıb. Qeyd edək ki, Tala çayı Vöytala kəndinin içindən keçir.
Sakinlərin Sputnik Azərbaycan-a verdikləri məlumata görə, dövlət qurumları kəndin vəziyyəti ilə maraqlanmır. Artıq neçə gündür ki, kənddə yaşayan sakinlərin ərzağı da bitib.
"Kəndin cavanları çayın içindən keçərək digər kəndlərə ərzaq arxasınca gedirlər"- deyə sakinlər bildiriblər.
Məsələ ilə bağlı Zaqatala Rayon İcra Hakimiyyəti ilə əlaqə saxladıq. Qurumdan bildirildi ki, hadisə baş verən gecədən sonra 3 gün müddətində sel basmış ərazilərdə yoxlamalar aparılıb, əhaliyə dəymiş ziyanın məbləği müəyyənləşdirilib və nəticələr Fövqəladə Hallar Nazirliyinə təqdim olunub.