İlham Əhmədov, Sputnik Azərbaycan.
BAKI, 10 may — Sputnik. Oğuzun Xaçmaz kəndində qeyri-adi aksiya həyata keçirilib. Belə ki, kənd sakinləri pozulmuş ekoloji sistemə dəstək məqsədi ilə təbii şəraitdə meşə ağaclarının soyunun artırılması və yeni meşə zolaqlarının salınması məqsədi ilə çöl şəraitində ağaclara calaq vurublar.
Sputnik Azərbaycan-ın bölgə müxbiri xəbər verir ki, bu aksiya respublikada ilk olaraq Oğuz rayonunun Xaçmaz kəndində həyata keçirilib. Aksiyada, ümumilikdə, 50 nəfər kənd sakini iştirak edib. Aksiyanin ilk günündən 6-7 hektar ərazidə 2500 ağaca calaq vurulub.
Sözügedən aksiyanın davamı olaraq avqust ayında yenidən tumurcuq calağı adlı yeni aksiya həyata keçirilməsi nəzərdə tutulur. Sakinlər qeyd edirlər ki, bu layihə meşələrin qorunması mesajının verilməsi üçün ideal vasitədir.
Layihənin ideya rəhbəri kənd sakini İlkin Lətifovdur. Onun sözlərinə görə, bu aksiya 5 il müddətində davamlı olaraq həyata keçiriləcək. Aksiyanin əsas məqsədlərindən biri də, keçən il meşə zolağında baş vermiş güclü yanğının fəsadlarının aradan qaldırılmasına və eko-tarazlığın yenidən bərpa olunmasına təkan verməkdir. Kənd sakinləri bu üsulla yeni meşə massivinin salınmasında eko sistemə, az da olsa, köməklik göstərmək istəyirlər.
Onu da vurğulayaq ki, keçən il aparılmış reydlər nəticəsində Şimal-Qərb bölgəsində ən çox qanunsuz şəkildə meşə qırılması məhz Oğuz rayonunda qeydə alınıb.