BAKI, 10 may — Sputnik. "İranın Suriyadakı bütün infrastrukturunu bombaladıq və ümid edirəm ki, bu hissə başa çatıb". Sputnik Azərbaycan "RİA Novosti" yə istinadən xəbər verir ki, bunu İsrailin müdafiə naziri Aviqdor Liberman deyib.
Liberman bildirib ki, İranın atdığı heç bir raket İsrailin nəzarəti altında olan ərazilərə düşməyib: "Təbii ki, biz cavab verdik. Demək olar, İranın Suriyadakı bütün infrastrukturuna zərbələr endirdik. Onlar bilməlidilər: Əgər burada yağış yağsa, orada daşqın olacaq".
Yəhudi nazir qeyd edib ki, İsrail münaqişədə maraqlı deyil, lakin istənilən bütün ssenarilərə hazır olmalıdır.
Xatırladaq ki, bu gün gecə saatlarında İran İnqilab Keşikçiləri Korpusunun xaricdəki qanadı olan "Qüds ordusu"nun İsrailin nəzarəti altında olan Suriyanın Colan təpələrini vurması barədə xəbər yayılıb.