BAKI, 8 may — Sputnik. Ermənistanda Azərbaycan tərəfdən respublikanın ərazisinə qanunsuz yolla daxil olmağa cəhd edən əcnəbi vətəndaşlar saxlanılıb. Sputnik Azərbaycan-ın məlumatına görə, bunu Ermənistan Müdafiə Nazirliyinin mətbuat katibi Artsrun Ovannisyan öz "Facebook" səhifəsində yazıb.
"Bu gecə erməni hərbi qulluqçuları Ermənistan-Azərbaycan sərhədlərini pozmağa cəhd edən altı xarici ölkə vətəndaşını saxlayıb" — deyə Ovannisyan bildirib.
İnsidentin təfərrüatları məlum deyil. O barədə daha ətraflı sonra məlumat veriləcək.
Məsələ ilə bağlı Azərbaycan Müdafiə Nazirliyinin mətbuat xidmətindən Sputnik Azərbaycan-a bildirilib ki, bu barədə onlarda hər hansı məlumat yoxdur.