Leyla Abdullayeva, Sputnik Azərbaycan
BAKI, 26 aprel — Sputnik. Prezident İlham Əliyevin "1918-ci il azərbaycanlıların soyqırımının 100 illiyi haqqında" Sərəncamına uyğun olaraq, aprelin 26-27-də Qusar şəhərində "XX əsrdə türk-müsəlman xalqlarına qarşı soyqırımları" mövzusunda V Beynəlxalq elmi konfrans keçirilib.
Sputnik Azərbaycan xəbər verir ki, Beynəlxalq konfransın təşkilatçıları Azərbaycan Milli Elmlər Akademiyasının Tarix İnstitutu, Türkiyənin Atatürk Araşdırma Mərkəzi, Türkiyənin Azərbaycandakı səfirliyi və Qusar Rayon İcra Hakimiyyətidir.
Konfransda Azərbaycanla yanaşı, dünyanın müxtəlif ölkələrindən (Türkiyə, Rusiya Federasiyası və onun müxtəlif subyektləri, Polşa, Albaniya, Özbəkistan, Qazaxıstan, Pakistan, Hindistan və İraq) görkəmli tarixçilər iştirak ediblər.
Tədbirin açılışı Qusar rayon Mədəniyyət Mərkəzində keçirilib.
Beynəlxalq elmi konfransın iştirakçıları əvvəlcə ümummilli lider Heydər Əliyevin Qusar şəhərində ucaldılmış abidəsini ziyarət edib, qarşısına gül dəstələri düzüblər. 1918-ci ildə Qanlı dərədə qələbə qazanmış Qusar və Quba qəhrəmanlarının şərəfinə ucaldılmış abidə də ziyarət edilib. Sonra Qusar Mədəniyyət Mərkəzində türk-müsəlman xalqlarına qarşı soyqırımları haqqında tarixi faktları özündə əks etdirən kitablar və digər nəşrlərdən ibarət sərgi ilə tanışlıq olub. Konfransın açılışında Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Prezident İlham Əliyevin konfrans iştirakçılarına ünvanlanan müraciətini oxuyub.
Konfransda çıxış edənlər son iki yüz ildə Azərbaycan xalqının başına gətirilən müsibətlərdən danışıblar. Çıxışlarda beynəlxalq elmi konfransın dövlətimizin başçısının "1918-ci il azərbaycanlıların soyqırımının 100 illiyi haqqında" 2018-ci il 18 yanvar tarixli Sərəncamına əsasən təşkil olunduğu diqqətə çatdırılıb.
İki gün davam edəcək beynəlxalq konfrans 3 bölmə üzrə aparılacaq. "1905-1906-cı illərdə Azərbaycan xalqına qarşı kütləvi qırğınlar", "1917-1920-ci illərdə Azərbaycan xalqına qarşı soyqırımları", "1948-1953-cü illərdə azərbaycanlıların öz tarixi torpaqlarından — Ermənistan SSR-in ərazisindən deportasiyası", "1988-1991-ci illərdə azərbaycanlıların öz tarixi torpaqlarından — Ermənistan Respublikasının ərazisindən deportasiyasının başa çatdırılması", "1991-1994-cü illərdə Azərbaycan torpaqlarının Ermənistan tərəfindən işğalı, azərbaycanlılara qarşı soyqırımları və etnik təmizləmələr" istiqamətlərində məruzələr dinləniləcək.
Konfransın bağlanış mərasimi isə aprelin 27-də saat 11:30-da Mədəniyyət Mərkəzində olacaq.