BAKI, 20 aprel — Sputnik. Yerevanda 80-dən artıq aksiya iştirakçısı müxtəlif polis bölmələrinə aparılıb. Sputnik Ermənistan-ın məlumatına görə, bunu paytaxt polisinin mətbuat xidməti bildirib.
"Məlumata görə, bu gün saat 12:00-dək 83 Ermənistan vətəndaşı saxlanılıb" — deyə polisin mətbuat xidməti bildirib.
Daha əvvəl polis Sevan-Yerevan magistralını bağlamağa cəhd edən bir qrup vətəndaşı qovmağa məcbur olub. Hadisə yerindən qovulanlar arasında hadisəni işqlandıran jurnalist Tirayr Muradyan da olub.
Sevan-Yerevan magistralı yarım saat bağlı qalıb. Hazırda polis sözügedən yerdə hərəkəti bərpa etməyə çalışır. Həmçinin, Yerevanın Azatutyan prospektində polis onlarla nümayişçini saxlamağa cəhd edir.
"Polis 1 №-li avtobusun açarlarını sürücüdən alaraq 10-dan çox gənci ora mindirdi və naməlum istiqamətdə apardı" — deyə Sputnik Ermənistan-ın hazırda hadisə yerində olan müxbiri bildirib.
Polis hazırda səkilərdə dayanaraq nümayişçilərə yalnız kiçik qruplar şəklində prospektdən keçməyə icazə verir.
Xatırladaq ki, "Yelk" fraksiyasınını lideri Nikol Paşinyanın təşəbbüsü ilə aprelin 13-də regionalardan başlayan "vətəndaş itaətsizliyi" aksiyası aprelin 16-da Yerevanda vətəndaşların yolları, küçə və meydanları bağlaması ilə davam etdirilib. Eks-prezident Serj Sarqsyanın baş nazir olmasına etiraz edən nümayişçilər getdikcə sıralarını daha da genişləndirir.
Nikol Paşinyan "Vətəndaşlıq borcu" partiyasının lideri, 2012-ci ildən Ermənistan parlamentinin deputatıdır. "Aykakan jamanak" qəzetinin baş redaktoru olub. Hər zaman müxalifət mövqeyində olan Paşinyan 2008-ci ildə Ermənistanın lk prezidenti Levon Ter-Petrosyanla birləşərək onun seçki kampaniyasında və 1 mart hadisələrində (100 minlik kütləvi aksiya) iştirak edib. Nəticədə onun haqqında axtarış elan edilib və o, bir il sonra polisə təslim olub.
2010-cu ildə Paşinyan kütləvi iğtişaşların təşkilinə görə 7 il müddətinə azadlıqdan məhrum edilib. Lakin 2011-ci ildə amnistiyaya düşüb. Levon Ter-Petrosyanın lideri olduğu Erməni Milli Konqresinin siyahısından parlamentə üzv seçilib. Hazırda parlamentin müxalifətçi "Yelk" blokuna rəhbərlik edir.