BAKI, 17 aprel — Sputnik. "Elmi-Praktik Hemofiliya Mərkəzində 2017-ci ildə 1585 xəstə dispanser qeydiyyatına alınıb". Bunu Sputnik Azərbaycan Multimedia Mətbuat Mərkəzində təşkil edilmiş tədbirdə Elmi-Praktik Hemofiliya Mərkəzinin direktoru, Azərbaycan Dövlət Həkimləri Təkmilləşdirilmə İnstitutun Hematologiya kafedrasının müdiri Elmira Qədimova deyib.
O bildirib ki, ölkəmizdə bu xəstəlikdən əziyyət çəkənlərin mümkün qədər tam dispanser qeydiyyatı və pasportlaşması həyata keçirilib: "2005-ci ildə "Hemofiliya və tolesimiya irsi qan xəstəliklərinə düçar olmuş şəxslərə qayğı" dövlət proqramı qəbul olunub. Dünya ölkələrinin 80 faizində bu cür xəstələr dərman preparatları ilə təmin edilmir. Azərbaycan isə o 20 faiz ölkələrdəndir ki, burada xəstələr dövlət hesabına dərman preparatları ilə təmin olunur".
"Ümumi statistikaya nəzər saldıqda görürük ki, ölkəmizin iri şəhərlərində hemofiliyalı xəstələrin sayı artıb. Xəstələrin 60 faizindən çoxu Bakı və ətrafında yaşayır. Son vaxtlar ambulator və ev şəraitində müalicə alan xəstələrimizın sayı artıb. Bu gün ölkə ərazisində 54 ağır hemofiliyalı uşaq ilkin profilaktika müalicəsi alır", — E.Qədomova vurğulayıb.