Leyla Abdullayeva, Sputnik Azərbaycan
BAKI, 12 aprel — Sputnik. Dünən Siyəzən rayonunun ən uzunömürlü sakini, 1909-cu il təvəllüdlü Dəmirova Nəcimə Cənnətəli qızı səsvermə hüququndan istifadə edib. Sputnik Azərbaycan-ın bölgə müxbiri xəbər verir ki, 109 yaşlı seçici səhhətinə görə seçki məntəqəsinə gedə bilməyib, yaşadığı evdə səs verib.
O, 54 saylı Şabran-Siyəzən Dairəsinin Böyük Həmyədəki 59 saylı məntəqəsindən gətirilmiş daşınan qutu vasitəsilə seçkiyə qatılıb. Nəcimə xanım öz səsini prezident görmək istədiyi şəxsə verdiyini bildirib.
109 yaşlı seçici bir çox hakimiyyətlərin dövründə yaşadığını və müqayisə etdikdə, indiki hakimiyyət quruluşundan razı qaldığını bildirib. Nəcimə nənə yeni seçiləcək prezidentdən ölkədəki əmin-amanlığı qorumağı da xahiş edib.
Qeyd edək ki, Qusarın ən uzunömürlü sakinlərindən biri olan 103 yaşlı Nazirat Vəlimətova da dünən öz səsvermə hüququndan istifadə edib. O, prezident seçkilərinə qatılaraq dəstəklədiyi namizədə səs verib.