BAKI, 11 aprel — Sputnik. Aprelin 11-də səhər saat 08:00-da Azərbaycanda prezident seçkilərində səsverməyə start verilib. Sputnik Azərbaycan-ın fotomüxbiri yerlərdə səsvermə prosesinin necə getdiyini fotokameranın yaddaşına köçürmək üçün Bakıdakı seçki məntəqələrində olub.
Səhər tezdən paytaxt sakinləri Azərbaycan prezidentliyinə öz namizədlərinə səs vermək üçün seçki məntəqələrinə yollanıblar. Seçki məntəqələrində yüksək seçici fəallığı müşahidə edilib. İnsanlar hətta səsverməyə balaca uşaqlarla birlikdə gəliblər. Pensiya yaşında olan seçicilərin fəallığı isə xüsusilə nəzərə çarpıb.
Seçki məntəqələrində səsvermə yerli vaxtla səhər saat 08:00-dan axşam saat 19:00-dək davam edəcək.
Azərbaycanda prezident seçkilərini 900-dən artıq beynəlxalq müşahidəçi izləyir. 58 beynəlxalq təşkilatdan və dünyanın 59 ölkəsindən 871 müşahidəçi akkreditasiya olunub. Akkreditasiyadan keçən yerli müşahidəçilərin sayı isə 54 864 nəfərdir.