BAKI, 3 aprel — Sputnik. Şimali Koreyanın xarici işlər naziri Ri Yonq-ho Çin səfərinin ardından cümə axşamı və cümə günü Azərbaycanın paytaxtı Bakıya səfər edəcək. O, həmçinin Rusiya paytaxtını da ziyarət edəcək.
Sputnik Türkiyə-nin məlumatına görə, bu barədə Cənubi Koreyanın informasiya agentliyi olan "Yonhap" məlumat yayıb. Ri Yonq-ho Çinə səfər etmək üçün ölkəsindən çıxıb. Oradan Azərbaycana gələcək. Şimali koreyalı nazir Bakıda "Qoşulmama hərəkatı"nın nazirlər səviyyəsində keçiriləcək konfransına qatılacaq.
Pxenyan hələlik nazirin kimlərlə görüşəcəyi barədə açıqlama verməyib. Amma Rusiya Xarici İşlər Nazirliyi daha əvvəl verdiyi açıqlamada Şimali Koreya xarici işlər nazirinin səfərinin baş tutması istiqamətində işlər gördüyünü bildirmişdi.
Politoloqlar Rinin Azərbaycan və Rusiya səfərinin Şimali Koreya lideri Kim Çen Inın keçən həftəki Çin səfəri ilə bağlı olduğunu, bundan əlavə, Şimali Koreyanın Kim Çen Inın Cənubi Koreya lideri Mun Çey İn və ABŞ prezidenti Donald Trampla bir araya gələcəyi zirvədən əvvəl digər ölkələrin dəstəyini almaq istədiyini deyirlər.